MULLER

 Muller

Non pido máis por ser muller

mais tampouco acepto menos,

tan só esixo o que se me debe

como ente que ten dereitos

que ninguén debera usurpar

no nome de razón ou sexo.

Eu reclamo a liberdade

de falar e obrar sen medo,

e a gozar sen atadallo

de canto para min foi feito,

arredada de prexuízos

e de atávicos receos.

Eu propugno o dereito á vida

forxada baixo o meu boceto

con vieiros por min enxeñados,

con tinos e con desacertos.

Unha vida que me pertence

e da que en soa dona me ergo.

     Silvia Figueiras