PARABÉNS

Outra molladura... 

 E mira que lle digo,

 larpeiro non saias do niño se chove... 

Nin caso... 

 A gravata sen nó, o traxe pingando, o canto un rouquén... Un piltrafa... 

Cando o merliño estaba pensando en trocar por escamas as plumas, semella que nos ceos ninguén pecha os grifos, debe estar mal visto e pagado o oficio de fontaneiro, xusto o día 11 chega o verán de san Martiño. 

Son só uns días, Xaquín, pero albízaras de igual xeito, non necesitamos paraugas para ir comer o polbo, aproveitemos. 

Amigo merlo, é obriga cada ano no día de hoxe, faga sol ou chova, acercarse á carballeira do Faramello, non sei se a mercar un cabalo, unha buxaina ou un sacho, pero sí a tomar unhas boas tapas de polbo á feira, mollar sopas de pan de trigo no prebe ata deixar o prato de madeira coma unha patena, e manchar os beizos cunhas cuncas de viño tinto. 

 Pero antes, Amigo Xocas, temos que adicarlle unhas verbas desexándolles a maior das ledicias a unha parella rianxeira que no día de hoxe pasan polo xulgado para oficializar a unión como muller e marido.

 Merliño, a vida dache agradables sorpresas de vez en cando. Tomo prestados para elo uns fermosos versos dunha Amiga poetisa de Pontevedra recén coñecida a través das redes, Anabelén Corbacho mil grazas... 

 Falan de mulleres guerreiras que libran duras batallas, e véñenme a pelo para facerlle honra á miña Amiga rianxeira, sendo outra a guerra :

 "A tí, muller de mil batallas,

 a tí, que es quen de abrir 

 cancelas pechadas, 

e de pechar

 feridas pasadas... 

 A tí, que eres berce, 

teito e acubillo

 cando o lóstrego asoma, 

a choiva molla, 

 e o vento azoa... 

A tí, que agora loitas vento en popa... 

 A tí, guerreira ! 

coas cores da coraxe 

 sempre por bandeira..." 

Manuela e Daniel, de parte do merlo, e miña, PARABÉNS...!! 

O Paraíso existe